Thursday, January 18, 2007

خطاب زقّف تقلّك

خطاب زقّف تقلّك

بعد كم يوم رح يطلّ علينا قائد العالم الحرّ والمعتدل بس مش سكاندينافيا و روسيا و كندا لإنّو رب ربّك ما بيتحمّل بردات كانون بهيديك البلاد.
رح يطلع و يبلّش يعدّ انجزات وانتاجات السنة (على سيرة الإنجازات والانتاجات لهل سنة، في حدا يقلّي شو صابو لزياد الرحباني (ر) بال2006 ؟ هيئتو اكتشف الفياغرا. إنّو معلوماتي مش أكيدة بس صحصح من النوم و كتّر، بيانات عراديوات، و بيانوات لبعد نص ليل، و مقالات و مهرجنات،يا إلاه، يا لطيف...ة. هاي بنرجعلا بعدين) بنرجع لبوش لي دحرج روس، و يمكن قتل حدا مهم بالصومال، هيدا لي يمكن كان إلو دعوة بتفجيرات السفارات بال98 ، و راح يشدّد على هالنقطة ليفرجي إنّو شطّور مش متل كلينتون يلي كان عم بيغزّ بمونيكا لمّا صارت غزوة أفريقيا.
على كلّن، لي بيميّز خطاب حالة الإتّحاد عن غيرو هو التزقيف. إنّو ولا مرّة طلع رئيس أميركاني وقال: يا جماعة الحالة خرى. أو خرة؟ ألف مقصورة أو تا مربوطة؟ هيدي ما علّمني إيّاها إيلي ماروني، أستاذي لاللّغة العربيّة سابقاً و زعيم الكتائب بزحلة حاليّاً رغم إنّو كان يعلّم فصحى. خلص بنسأل البطريرك بما أنّو هو الخبير. خبير بالتا المربوطة ، ما تسببولي مشاكل سوء تفاهم هلّق، سيدنا البطرق بيشدّّ بلفظة التا المربوطة: حكومةّ وحدةّ وطنيةّ، هيدا كان قصدي. المهم، بنرجع عالموضوع الرئيسي الرئاسي. الرئيس لي بيحظى برضى تلت شعبو و تلت شعبنا رح يطلع يوعظ كيف اتّحادو قوي و متين و بيلقى دعك و جسمو لبّيس و مزدهر و جغل و سكسي ماكسيموم. و رح يزقفولو جماعتو تزقيف مبرمج و منسّق و مترجم و مدبلج ما في متلو إلاّ بالشام. الحرب تزقيف، الضمان الاجتماعي تزقيف، دسبريت هاوس وايفز تزقيف و تهييص. بس الفرق بين الديموقراطيّة الهوليووديّة النموذجيّة و الديموقراطيات الشقيقة هو إنّو هونيك بيضلّو من وقت لي بيخلص بوش لتلتي لوقت ما يبلّش السوبربول لي هو أهمّ حدث رياضي عندن يعني متل أطول أوف بالأوّل علLBC عنّا، بيضلّو عم بيحلّلو. لا مش الخطاب، ... التزقيف.

كلّ محطّات التلفزة والإذاعة والمطبوعات رح تخبّرنا و تبشّرنا كم مرّة زقّفولو لقبضاي زمانو و قدّيش كان معدّل طول و عرض كل زقفة. و رح يطلعلنا شي صحافي حاطومي بيحب ينكش أكتر من غيرو ليحسبلنا كم ديسيبل كانت كل زقفة من إيام ما اخترع الكسندر غراهام بل الصوت لليوم.

خلاصة الموضوع، حضروا حالكن، في حرب جديدة بالمنطقة لإنو الحقيقة كلنا زهقنا من العراق.

6 comments:

Anonymous said...

السوبربول لي هو أهمّ حدث رياضي عندن يعني متل أطول أوف بالأوّل علLBC عنّا


وقهقه وقهقه وقهقه!!!!! :D

Anonymous said...

Hello, my name is Lydia Sizer and I am working on a thesis through Brown University in the United States looking at blogs. I am looking at how blogs affect mutual understanding among people of different ethnic backgrounds and I was wondering if you would be willing to take a survey I have prepared for my research. This research would give you a voice in determining whether blogs would be useful in aiding global security and counteracting racism. If you are interested, don't hesitate to email me at Lydia_Sizer@brown.edu. Thank you so much for your time. For convenience, please enter "thesis survey" as the subject of your email as I will not know who is writing to me. Thanks again! In addition, you will receive an email later from lscello@aol.com. This is because my school email is routed through my home email. Thanks!

--Lydia Sizer

Maya@NYC said...

hahahahahhahaah.... bi 3a'ed!

Anonymous said...

Eh ma3ak 7a2, what happened to Ziad Rahbani?

Anonymous said...

Allah ybashrak bil Kheir

Anonymous said...

أنا السؤال الوحيد يلي بحب إسألو، ليش ما حدن بعد إكتشف موهبتك ؟
:)